Dapi var tschient onns servan pendicularas pitschnas en territoris muntagnards per render accessibel cuntradas isoladas. D’enviern porschan ellas anc oz in access al traffic segir a famiglias da purs da muntogna e carmalan cun lur chars nostalgics era pli e pli turists.
Il pli fitg derasadas eran – ed èn anc oz – talas pendicularas pitschnas en la Svizra centrala, en ils chantuns Uri e Sutsilvania. L’emprim eran ellas exclusivamain meds da transport per l’agricultura alpina e da muntogna. Tar bleras da quellas è pli tard sa sviluppà supplementarmain in diever turistic. Pendicularas èn dentant custusas e dovran bler mantegniment – cunzunt dapi che la Lescha davart las telefericas è entrada en vigur l’onn 2007. In basegn d’investiziuns economicamain strusch supportabel è daventà realitad en blers lieus. En questa situaziun difficila han ils pertutgads empruvà da dumagnar las sfidas communablamain. Els han fatg lavur da lobi per lur pendicularas pitschnas, han chattà novas amias e sustegniders e represchentan ozendi cun lur purschidas exemplaricamain in tip da turissem da muntogna miaivel.
