La sgnocca e la satira appenzellaisa

Il clisché da l'Appenzellais spiertus è sa furmà la fin dal 18avel tschientaner, tranter auter tras l'ovra da Johann Gottfried Ebel. Perditgas da sgnoccas en l'Appenzell chattan ins dentant gia pli baud. Raquintaders da sgnoccas e satirichers che han success lunsch enturn conferman lura pli tard il maletg dals leghers Appenzellais. Sgnoccas raquintadas a bucca che fan lur effect e che vegnan er dadas vinavant a bucca, èn vegnidas registradas en scrit dapi il 19avel tschientaner. Sco ovra da standard vala la renumada collecziun dad Alfred Tobler da l'onn 1905. Pli novas èn las collecziuns da Ruedi Rohner, il maister da la sgnocca appenzellaisa, da Walter Koller, dad August Inauen e da Toni-Sepp Wyss. La vart politica da la satira appenzellaisa represchenta Carl Böckli, in cumbattant cunter l'opportunissem e cunter ideologias totalitaras. El ha publitgà sias caricaturas e ses versets sut il pseudonim «Bö» oravant tut en il «Nebelspalter». Per la furma moderna dal cabaret e da la satira stattan Simon Enzler ed il slam da sgnoccas («Witz-Slam») ch'è sa furma l'ultim temp e che collia la tradiziun cun la cultura da slam. Sgnoccas appenzellaisas ed istorgias spiertusas raquintadas en circuls socials, ad occurrenzas u sur cudeschs (auditivs) èn divertaivlas fin oz. Sin la senda da viandar da sgnoccas tranter Heiden e Walzenhausen pon vegnir cumbinads idealmain il daletg da la cuntrada ed il divertiment da las sgnoccas.

Praticas socialas