Pelegrinadi a Nossadunnaun

Viandar u viagiar ad in lieu sontg – il pelegrinadi – vegn pratitgà en Svizra da bleras persunas catolicas, exercitond lur cardientscha. Entant che blers rituals pietus celebrads publicamain han pers lur visibilitad e lur impurtanza u èn schizunt svanids dal tuttafatg durant la segunda mesadad dal 20^avel tschientaner, è il pelegrinadi restà attractiv per in grond public da tut las classas socialas. Ils motivs religius tradiziunals per in pelegrinadi èn vegnids cumplettads u remplazzads l'ultim temp tras il basegn da far experientschas persunalas. En la Svizra centrala pon ils pelegrins visitar in grond dumber d'edifizis sacrals cun figuras specificas da Nossadunna u da sontgs, ch'èn destinads al pelegrinadi local. Ultra da quai exista in'entira retscha da baselgias da pelegrinadi ch'attiran – cun lur maletgs da grazia e cun lur reliquias – in public surregiunal. La baselgia la pli frequentada è quella da la claustra da Nossadunnaun. Mintga onn visitan var 500'000 pelegrins da tut il mund la chaplutta da grazia ch'è integrada en la baselgia per vesair e per venerar la Nossadunna naira, ina figura da lain da la gotica tardiva, ch'è exponida là. La gronda part dals pelegrins deriva da la Svizra e da l'exteriur vischin (Italia dal nord, part sid da Baden ed Alsazia); fitg bain represchentads èn plinavant pelegrins dals pajais da l'Europa da l'ost sco la Pologna, l'Ungaria u la Slovachia. La tradiziun da pelegrinadi da Nossadunnaun datescha almain dal 13^avel tschientaner – probablamain è ella dentant anc pli veglia.