*Integrada en la glista represchentativa dal patrimoni cultural immaterial da l'UNESCO
Las processiuns da l’Emna sontga, ch’èn documentadas dapi la segunda mesadad dal 17avel tschientaner, giran la saira da la Gievgia sontga e dal Venderdi sontg tras la citad veglia da Mendrisio. Per questa chaschun vegn stizzada l’illuminaziun da las vias ed en las giassas sa derasa la glisch miaivla dals «trasparenti»: i sa tracta da gronds maletgs glischants che vegnan dissegnads sin tailas transparentas, montadas sin roms da lain ed illuminads da l’intern. Els han furmas e dimensiuns fitg diversas e vegnan montads lung la ruta da la processiun sur las giassas vi. Sin ils «trasparenti» èn represchentadas scenas da l’Evangeli u dal Vegl Testament. La saira da la Gievgia sontga preschentan var 270 acturs laics la Passiun da Cristus en ina seria da scenas che sa basan sin l’Evangeli. A questas represchentaziuns sa participeschan chavaltgaders, schuldads romans e figuras biblicas en costums pompus. Ina caracteristica da quest defilé da scenas è ch’i mancan dialogs discurrids tranter las figuras che s’expriman unicamain cun posituras e gests silenzius.
La processiun dal Venderdi sontg è modesta e solenna ed è caracterisada pli fitg da la spiritualitad. A questa processiun sa participeschan passa 600 commembers da differentas confraternitads e d’associaziuns ecclesiasticas. Ils purtaders passan tras las vias cun ils purtrets da la bara da Cristus e da Nossadunna da las dolurs, davant ils quals il public è envidà da s’enclinar. Trais societads da musica accumpognan la processiun, sunond marschs funebers impressiunants. Al cumenzament ed a la fin da la processiun chavaltgeschan ils tamburs da l’avantguardia. Avant las processiuns da l’Emna sontga ha lieu il «settenari», ina ceremonia religiusa ch’è deditgada a las set dolurs da Maria.
Descripziun detagliada
Processioni della Settimana Santa di Mendrisio (PDF, 365 kB, 27.06.2018)descrizione dettagliata
Sparta
Arts figurativs
Chantun
Documents da video
Tradiziuns parentas
Publicaziuns
Giorgio Lazzeri, Renzo Petraglio: I trasparenti di Mendrisio. Storia dei quadri notturni della passione. Bellinzona, 1995
Giorgio Lazzeri, Mario e Flavio Medici, Alberto Nessi, Amleto Pedroli: Le processioni storiche di Mendrisio. Locarno, 1998
Interviste (a cura di Alessandra Bobbià): Giovanni Poma (13.07.2011, 18.07.2011), Rodolfo Bernasconi (09.07.2011, 13.07.2011). Centro di dialettologia e di etnografia. Bellinzona
Mario Medici: Le processioni della Settimana Santa a Mendrisio. Mendrisio, 1946
Mario Medici: Sagre del Mendrisiotto. Mendrisio, 1967
Mario Medici: Storia di Mendrisio. Mendrisio, 1980
Carlo Solcà, Gian Paolo Minelli: La manifestazione sacra di Coldrerio. Coldrerio, 1995
Chavazzins
Contact
Fondazione processioni storiche di Mendrisio