La festa da Sontgilcrest da Savièse en il Vallais central vegn organisada da las singulas fracziuns da la vischnanca en in turnus da 5 onns. Il di da festa cumenza a las 5.00 cun la «diane» che vegn sunada davant las chasas dals 9 commembers dal comité che organisescha la festa. A las 7.30 sa radunan las participantas ed ils participants da la festa davant la chasa communala. La bandiera communala vegn pendida ora, l'uschenumnà «sponton» (lantscha d'uffizier) vegn retratg a la chasa dal «capetan» e la bandiera communala a la chasa dal «banneret». A las 9.00 marscha il cortegi, engrondì tras la gruppa d'uffants, ils uschenumnads «tsanbrides», a la baselgia, nua che vegn celebrada la messa gronda. Il punct culminant dal di è la processiun. Il Sontgissem vegn manà en la monstranza tras il vitg da St-Germain. Tras la cumbinaziun d'in grond dumber d'elements verbals, musicals, choreografics e visuals survegn l'eveniment la tempra d'in spectacul.
Suandar suonda la part profana che cumenza cun il gentar e che cuntinua en ils quartiers cun festas ed ustarias. Interrutta vegn la festa dal suentermezdi mo a las 15.00 da las vespras en baselgia. En il decurs dals onns èsi reussì a la festa da Sontgilcrest da Savièse da reagir en moda flexibla sin midadas socialas e da mantegnair a medem temp sia singularitad.
