Processiun da Sontgilcrest ad Appenzell

Dapi il temp medieval celebrescha la Baselgia catolica diesch dis suenter Tschuncaisma la festa da Sontgilcrest, e quai en regurdientscha da l'instituziun dal sacrament da l'altar, da l'eucaristia. Entant che Sontgilcrest è oz en la gronda part dals chantuns in lavurdi ordinari, vegn quest di anc adina celebrà ad Appenzell Dadens sco gronda festa catolica cun ina processiun. La processiun fa impressiun pervia da sias colurs baroccas. Il Sontgissim – en la monstranza sut il baldachin – vegn accumpagnà dals spirituals en ornat festiv e dals «grenadiers dal Segner». Bandierels d'uniuns ecclesiasticas e profanas, «Rhodsfähnriche», giunchers, autoritads, cussegliers parochials e chors-baselgia, ministrants, primcommunicants, la partiziun locala dals battasendas, la societad da musica, dunnas en costums e tiradurs da Sontgilcrest – els tuts furman la processiun. Zunt impressiunanta è la gronda partiziun da dunnas en costum da festas e las 15 giuvnas cun tavlas, las uschenumnadas «Täfelimeedle». Questas dunnas giuvnas en costum da dunschella nair ed alv portan tavlas da lain picturadas che mussan ils 15 misteris dal rusari.