Saut popular en la Svizra centrala

Maletg 1 /

‹ › ×

Las occurrenzas publicas da saut han midà fundamentalmain lur funcziun en il decurs dal 20^aveltschientaner. En las parts ruralas da la Svizra centrala eran ellas – a la fin dal 19^avel tschientaner – insumma permessas en blers lieus mo durant paucs dis da l'onn, en spezial a chaschun dal tschaiver, da fieras e da nozzas. Suenter la Segunda Guerra mundiala, sut l'influenza da stils globalisads sco rock & roll, breakdance u salsa, èn ellas sa profiladas sco ina purschida da temp liber tranter bleras. Tar las furmas da saut tradiziunalas – oravant tut tar il schottisch, la polca, il valzer, la mazurca, il foxmarsch ed il foxtrot – èsi stà pli e pli impurtant d'evocar in sentiment d'attaschadadad a la patria. Dapi ils onns 1930 sa deditgeschan sin plaun naziunal cunzunt las uniuns da costums cun lur activitads a la tgira activa dals sauts populars. En las 162 vischnancas da la Svizra centrala existan actualmain 904 talas uniuns. Ellas preschentan lur sauts principalmain a chaschun da festas popularas e da festas d'uniuns, en il rom d'occurrenzas deditgadas a tradiziuns u al Di da costums da la Svizra originara. In'atgna scena furman quellas sautunzas e quels sautunzs che sa deditgeschan al «Bödälä» (er numnà «Bedälä» ed en il chantun Sviz «Gäuerle»). L'atgnadad da quest saut tradiziunal è quella ch'i vegn zappitschà da maniera expressiva e ritmica cun ils pes sin il fund. Ils tuns producids uschia servan sco percussiun per la musica populara, che vegn per il solit sunada live.