Cultura da tecno da Turitg

La cultura da tecno è ina cultura da giuventetgna cun il stil da musica tecno sco part centrala. Tecno è ina fusiun da plirs stils da la musica da saut electronica. Turitg tutga tar las citads che han recepì gia baud il tecno. Cur ch'il tecno festivava sia fasa culminanta ils onns 1990, è Turitg daventà ina citad da party impurtanta en l'Europa. Oriundamain eran partys da tecno occurrenzas unicas en tschalers ed en deposits che vegnivan utilisads temporarmain per quest intent. Cun il temp è s'etablida ina scena da club che ha organisà da lura davent regularmain events da tecno. Enturn la musica da tecno è sa sviluppada in'atgna scena. En il center da la scena da tecno stat il DJ che metta si musica en il club, e betg – sco tar autras scenas da musica – bands, chantadurs e concerts. A Turitg è la scena da club fitg variada. Ultra da quai caracterisescha la Street Parade annualmain la cultura da tecno da Turitg. Ella è vegnida permessa l'emprima giada l'onn 1992 sco «demonstraziun per charezza, pasch, libertad, generusadad e toleranza» ed attira mintgamai var 1 milliun visitadras e visitaders.