Son Niclà a Friburg

Maletg 1 /

‹ › ×

Mintga emprima sonda da december turna Son Niclà sin ses asen en la citad da Friburg, accumpagnà d'in cortegi da musicists, da chantadurs e da famegls. Cun la mitra sin il chau e vestgì cun in mantè da saida alv chavaltgescha il sontg cun sia barba alva sco la naiv tras la citad, en la glisch da fuschellas ed accumpagnà dals suns dals zains, avant ch'el prenda puspè en possess sia catedrala. Giu dal clutger salva el in pled festiv, drizzà ad ina fulla da var trenta milli persunas ch'èn sa radunadas en las vias vischinas e sin la plazza davant la catedrala, nua ch'i vegn purschì vin chaud dapi la damaun. A quest di chattan las Friburgaisas ed ils Friburgais che turnan savens aposta per questa occurrenza en lur citad natala puspè ina part da lur uffanza. En blers vitgs visita Son Niclà er las famiglias per recumpensar ils uffants, dals quals el vala sco protectur. Sch'els èn stads bravins, als regala el ina pizieuta cun ses purtret, sche betg, als surdat el a ses famegl.

En la furma actuala è la Festa da Son Niclà vegnida relantschada l'onn 1906 sin iniziativa d'in pèr gimnasiasts. Dapi lura vegn ella organisada dal collegi da Son Michel. A la festa da Son Niclà sa participeschan scolars, magistraglia ed autoritads da la citad e da la baselgia. Tuts gidan che questa festa daventia in success e quai uschè diligentamain che la ficziun e la realitad sa maschaidan, essend ch'il vair uvestg da la diocesa beneventa uffizialmain l'uvestg imità sut il portal da la catedrala.