Da la fin d'october fin la dumengia suenter l'uschenumnà «Chlausmarkt» da Lenzburg (la segunda gievgia da december) sin far notg vegni giaschlà cun giaischlas lungas en il district da Lenzburg. Mintgin po dar schlops cun la giaischla, independentamain da la schlattaina e da la vegliadetgna. En intginas vischnancas han er lieu concurrenzas da giaschlar en differentas categorias. A Hallwil datti la saira dal «Chlausmärt» ina chatscha da mascaradas («Chlausjagen») ed a Niederlenz surdattan ils alvs ed ils nairs regals als uffants.
Ils dus usits vegnan accumpagnads da battagiaischlas («Chlauschlöpfer»). Il giaschlar è ina tradiziun è documentada fin il 16avel tschientaner. Ella sa basa sin la persvasiun ch’ins possia sa proteger cunter demunis e cunter autras nauschas influenzas cun canera snuaivla e cun ils ferms schlops da las giaischlas. In'autra istorgia d'origin raquinta la ditga da Son Niclà («Chlaus-Sage») da Lenzburg: Il giaschlar duai svegliar il Son Niclà en ses cuvel. Dapi ch'el saja vegnì vilentà ina giada da mattatschs na sa mussia el betg pli en citad.
Ultra da l'art da dar correctamain schlops cun la giaischla è er la producziun da quella ina tradiziun viva che vegn tgirada mo pli en trais lieus en tut la Svizra. In da quels lieus sa chatta en il chantun Argovia. Il giaschlar unescha perquai pliras tradiziuns: la pratica culturala dal giaschlar, las il savair e la producziun da las giaischlas sco er la tradiziun d'istorgias sco la ditga da Son Niclà da Lenzburg.
