Usits da son Niclà en la Svizra centrala

Maletg 1 /

‹ › ×

La figura tradiziunala da son Niclà è omnipreschenta en la Svizra centrala ils 6 da december sco er ils dis precedents e suandants. En blers lieus visita son Niclà las famiglias cun uffants, las uniuns u las residenzas da seniors. Numerus vitgs enconuschan ultra da quai in cortegi da son Niclà che vegn specifitgà – tut tenor il lieu – sco arrivada u sco partenza. En ses vestgì cotschen absolva son Niclà ina ruta prescritta en cumpagnia dals «Trychler» (che fan sclingir las stgellas), dals «Geisselchlöpfer» (che schluppegian cun la giaischla) e da persunasche portan laternas, faclas ed uschenumnadas «Iffelen» (grondas laternas en furma da mitras). Accumpagnà vegn son Niclà per regla dals famegls vestgids en mantels stgirs, savens er d'in asen, pli darar d'in poni, mintgatant er da servients e d'anghels. El va per il solit a pe, en singuls cas er a chaval, en charrotscha u cun ina nav. L'origin da quests cortegis è da chattar en ina represchentaziun d'uvestg dal temp medieval tardiv che vegniva giugada dals scolars claustrals e ch'era derasada en tut l'Europa centrala. L'occurrenza singula la pli enconuschenta da quest cumplex d'usits è il «Klausjagen» a Küssnacht al Rigi che attira adina blers aspectaturs.