Torrée (grillada en il liber)

Tar ina dretga torrée tutga in saucisson da Neuchâtel che vegn zuglià en in fegl da giabus, en in palpiri da mazler surtratg, en palpiri da gasettas u en aluminiun e pargialà in bel di sulegliv en la burnida d'in fieu a l'ur dal guaud. Latiers datti tartuffels, salata, paun ed autras delicatessas sco er in magiel vin ed in zic mustarda per rinforzar l'aroma. Tut ils Neuchâtelais tgiran questa tradiziun; ella è daventada oz ina festa da famiglia u ina festa tranter amis. Oriundamain è ella dentant sa sviluppada en connex cun lavurs da runcada dals purs che stuevan proteger lur pastgiras da la derasaziun dal guaud e che stuevan perquai realisar mintg’onn in'acziun da runcada per tgirar las surfatschas utilisadas da lur bains. Els prendevan mintgamai cun sai ina liongia e la brassavan en il grond fieu fatg cun las restanzas da la runcada. D'ina acziun liada ad in intent specific è sa sviluppada la torrée ad in divertiment da temp liber. Ma tgi che la pratitgescha, prova tuttina da respectar la natira e da far attenziun da chattar in lieu adattà e da puspè rimnar il rument. Ils selviculturs recumondan ina plazza libra, lunsch davent avunda da plantas giuvnas, e da plunar crappa enturn il fuclar. L'occurrenza è daventada uschè populara ed impurtanta per la regiun che la citad da Le Locle organisescha mintg‘onn per las persunas che vegnan ad abitar là ina gronda torrée per sensibilisar uschia ils novs abitants per l'effect identitar da las torrées.

Natira ed ambient