La tradiziun dal teater d’amaturs ch’è enragischada en la Svizra romanda n’è betg be in d’affar dal palc. Ella è entretschada fermamain en la structura sociala locala. Questa furma artistica populara ha numnadamain grond success en la champagna da la Svizra romanda, nua ch’ella profitescha d’in public fidaivel.
Il teater d’amaturs è ditg vegnì pratitgà en il circul da famiglias u en il ravugl d’amis, enritgind uschia las sairadas. En la Svizra romanda cumpiglia il teater d’amaturs anc oz regularmain diversas uniuns localas sco per exempel fanfaras, societads da chant, uniuns sportivas u gruppas communalas.
Tenor in’enquista da l’Uffizi federal da statistica da l’onn 2019 participeschan activamain var 65% da la populaziun svizra ad activitads culturalas sco «amatur engaschà», dals quals 2% èn participads a teaters d’amaturs. Quel è enragischà pli fitg en la Svizra romanda ch’en autras regiuns linguisticas e vegn pratitgà pli savens en las zonas ruralas u intermediaras ch’en il milieu urban. La gruppa da vegliadetgna tranter 15-29 onns è la pli activa, suandà da quella tranter 45-59 onns. Questa survista quantitativa na porscha dentant nagin panorama represchentativ dal teater d’amaturs en la Svizra romanda, perquai ch’ella na tegn betg quint da tuttas activitads teatralas occasiunalas e mumentanas e da las cumpagnias che n’han nagin basegn da s’affiliar a societads da teater, saja quai da giuvenils u da seniors.
