Commemoraziun da Clau da Flia

Clau da Flia (1417–1487) era in pur da Sachseln ed il bab da diesch uffants, avant ch'el è sa retratg l'onn 1467 tut sulet en la chavorgia da Ranft per viver da là davent sco eremit. Gia durant sia vita è el vegnì caracterisà sco um sabi e devot, gea schizunt sco in sontg vivent. Tant simpels purs sco er regents aristocratics e politichers al dumandavan per ses cussegl fitg apprezià. Gia curt suenter la mort da frà Clau, sco ch'el vegniva numnà, han cumenzà ils emprims pelegrinadis a Sachseln ed a Ranft ed èn cumparids ils emprims tractats da pelegrinadi e las emprimas biografias. L'onn 1649 ha Roma decidì la beatificaziun. Quel mument è vegnida fixada ina festa annuala da frà Clau che ha lieu ils 21 da mars, il di da sia mort. Quest termin è daventà, ultra dal di commemorativ per la consecraziun dals anghels dad Einsiedeln (ils 14 da settember), en pauc temp il di da festa il pli impurtant da l'onn per ils catolics da la Confederaziun. Suenter la canonisaziun da frà Clau l'onn 1947 ha il Vatican spustà il termin per la festa sin ils 25 da settember. Dapi lura sa scuntran quest di d'atun, ch'è daventà en il chantun Sursilvania in firà, plirs tschients indigens e pelegrins da lontan e da manaivel per in servetsch divin festiv che ha lieu en la baselgia parochiala da Sachseln. Suenter la messa datti in aperitiv per il pievel cun accumpagnament musical. Bleras persunas visitan er la fossa da frà Clau e l'eremitadi.