Construir mirs sitgs*

*Integrada en la glista represchentativa dal patrimoni cultural immaterial da l'UNESCO

Maletg 1 /

‹ › ×

Plunar crappa natirala a mirs sitgs stabils che vivan ditg, senza duvrar maulta, cement u colla, è ina tradiziun che vegn pratitgada dapi blers tschientaners. Mirs sitgs appartegnan al maletg da la cuntrada cultivada en Svizra. Els dattan perditga da la cultura architectonica champestra e da l'artisanat rural. Els porschan in spazi vital custaivel a plantas ed ad animals e promovan uschia la biodiversitad. Ord plaschair da las bellas furmas ed en enconuschientscha da las funcziuns multifaras dals mirs da crappa plunada s'engaschan diversas organisaziuns e differents mastergnants per questa veglia tecnica da construcziun. Els intermedieschan enconuschientschas spezialisadas e protegian uschia vegls mirs sitgs da la decadenza. En il rom da curs da construcziun e d'acziuns dal servetsch civil vegnan construids mirs novs. Er en novs ierts vegnan mirs sitgs integrads adina pli savens. Ils ultims onns han mirs sitgs survegnì adina dapli attenziun. Lur impurtanza artisanala, estetica ed ecologica è oz renconuschida.