Tagliar schlondas

Tscherner il dretg lain, far permez quel cun sentiment e tagliar mintga schlonda en il dretg angul: Las abilitads dal tagliaschlondas èn tant precisas sco atemporalas. En la Svizra franzosa datti mo pli var 20  tagliaschlondas che san quest mastergn. Els cuvran instancablamain tetgs e fatschadas cun tschients da schlondas, questas planettas satiglias che vegnan fatgas per gronda part da laina da pign. Tut tenor la grondezza e la regiun da fabricaziun vegnan duvradas per las schlondas differentas designaziuns. Cun il temp survegnan las schlondas ina colur grisch-argientada. Tras quai sa protegia il lain cunter influenzas da l'aura. En Svizra derivan ils emprims fastizs dal temp gallic-roman. Els èn vegnids chattads als lieus da las exchavaziuns archeologicas a Holderbank (Soloturn) ed ad Oberwinterthur. Las activitads che quests fastizs inditgan marcheschan il cumenzament d'in lung svilup. En la Svizra bassa èn las schlondas vegnidas remplazzadas tras tievlas pir il 17^avel e 18^avel tschientaner. Ed en las regiuns da muntogna èn las schlondas vegnidas duvradas fin il 19^avel tschientaner. Novas materialias e las mesiras per impedir incendis da vitgs han gì per consequenza ch’ins ha duvrà adina pli paucas schlondas. Perquai vesan ins ellas ozendi mo pli vi d'edifizis istorics e vi da tegias d'alp e chamonas. Tetgs e fatschadas da schlondas èn in segn caracteristic per las Prealps friburgaisas. Las schlondas vi d'ina fatschada ston vegnir remplazzadas pir suenter circa 100 onns. Quai è in mussament ch'i sa tracta d'ina lavur difficila e preziusa; in artisanadi che vegn pratitgà cun ardiment, ch'è dentant periclità pervi dal martgà che daventa adina pli pitschen.

Natira ed ambient