La producziun da cudeschs ha ina gronda tradiziun a Son Gagl. Sco perditga da quai cuntegnan las differentas bibliotecas da la citad anc oz in stgazi istoric cun manuscrits artistics e cun exemplars magnifics da las emprimas tecnicas da stampa, ma er in inventari impurtant da la cumposiziun contemporana da cudeschs. Persunalitads istoricas enconuschentas han influenzà questa tradiziun, tranter quellas numerus artists da cudeschs da la claustra da Son Gagl dal temp medieval tempriv, ma er il burgamester refurmatoric e poet Vadian. Sia collecziun da cudeschs è daventada il fundament per la biblioteca chantunala Vadiana. Ina da las gasettas las pli veglias da l'Europa, «Annus Christi», è vegnida stampada a Rorschach en la prinzi-abazia da Son Gagl.
Tradiziun a Son Gagl ha ultra da quai la cumposiziun da cudeschs cun ina tipografia pretensiusa. Ier sco oz datti instituziuns e cumpositurs da cudeschs da renum mundial che lavuran qua, che dattan impuls per in discurs contemporan e che chattan resun internaziunal cun lur cudeschs. Instituziuns sco la chasa editura da Henry Tschudy, cumpositurs sco Rudolf Hostettler, Max Koller, Hans-Peter Kaeser e Jost Hochuli èn caracteristics per la tradiziun dal cudesch a Son Gagl. Lur scolars sco Gaston Isoz e l'agentura TGG Hafen Senn Stieger cuntinueschan cun questa tradiziun, e designers giuvens tegnan oz la cultura da cudeschs al puls da l'actualitad.
Pagina dal Codex Abrogans da Son Gagl, il cudesch il pli vegl en lingua tudestga. [Cod. Sang. 911, pergiamina, 323 pp., Abrogans – Vocabularius (Keronis) et alia, enturn 790] © Stiftsbibliothek St.Gallen
Sala d'exposiziun da la Biblioteca dal chapitel [Son Gagl, 2014] © Stiftsbibliothek St.Gallen
Ils dissegns circulars da Max Bill cumpletteschan en moda congeniala las 33 constellaziuns da Gomringer. Ils texts ed ils dissegns èn ordinads in vers l'auter e plazzads sin la pagina en moda sensibla. [Eugen Gomringer: 33 konstellationen. Cumparì tar la chasa editura Tschudy. Son Gagl, 1960] © VGS Verlagsgenossenschaft St.Gallen
In agid prezius per il tipograf laic e per l'istoricher da tipografia, cumponì en moda generusa. [Rudolf Hostettler: Type. A selection of types. Une sélection de caractères d’imprimerie. Eine Auswahl guter Drucktypen. Son Gagl, Londra, 1949] © VGS Verlagsgenossenschaft St.Gallen
Cuverta da la retscha cumponida da Rudolf Hostettler «Hubers Klassiker der Medizin und der Naturwissenschaften». [Josef Tomcsik (ed.): Pasteur und die Generatio spontanea. Berna, Stuttgart, 1964] © VGS Verlagsgenossenschaft St.Gallen
Ina lavur ch'è stada ina sensaziun internaziunala, cur ch'ella è cumparida – pervia da ses concept e pervia da sia cumposiziun pratica, survesaivla ed a medem temp attractiva. [Rudolf Hostettler: The printer's terms. Son Gagl, 1949] © VGS Verlagsgenossenschaft St.Gallen
Sin in raster rigid vegnan preschentads differents alfabets da scrittiras stampadas, ensemen cun ils creaders, cun l'onn da la publicaziun e cun ulteriuras infurmaziuns. [Jost Hochuli: Freude an Schriften. Spass an der Freude. Ein typografisches Pasticcio. Son Gagl, 1993] © VGS Verlagsgenossenschaft St.Gallen
Durant in temp che naginas stamparias n'investivan pli en cudeschs cun models da scrittiras, ha Zollikofer edì quest register: cuntegn da 24 paginas, fermà cun agraffas en ina cuverta da palpiri grischa; las infurmaziuns las pli necessarias, cumponì en moda survesaivla e spiertusa – la lavur d'in profi. [Zollikofer SA, St. Galler Tagblatt: Schriftenverzeichnis. Son Gagl, 1989] © VGS Verlagsgenossenschaft St.Gallen
Gia la surtratga da la cuverta inditgescha ch'il cuntegn da questa documentaziun ha ina cumposiziun gist uschè generusa. [Hochbauamt der Stadt St. Gallen: Natur- und Kunstmuseum St. Gallen 1877/1987. Son Gagl, 1987] © VGS Verlagsgenossenschaft St.Gallen
In gieu spiertus tranter maiusclas d'ina scrittira senza serifas mez grassa ed ils segns correspundents da Morse sco er las bandieras da signal. Il palpiri transparent stampà en blau permetta transvistas e supraposiziuns fascinantas. [Ian Anüll: Künstlerheft. Son Gagl, 1987] © VGS Verlagsgenossenschaft St.Gallen
Per il carnet da Typotron che cumpiglia 168 paginas e che paisa 1 kilogram ha l'autura Liana Ruckstuhl intervistà 15 anteriurs locomotivists. [Typotron-Heft 28 – Lokremise St.Gallen, 2011] © TGG Hafen Senn Stieger
Cun plaschair visibel ha il cumpositur dà ina furma adequata a quest roman satiric. [Jaroslav Hašek: Geschichte der Partei des gemässigten Fortschritts im Rahmen des Gesetzes. Berlin, 2005] © VGS Verlagsgenossenschaft St.Gallen
Descripziun detagliada
St. Galler Buchkultur (PDF, 490 kB, 29.05.2018)Ausführliche Beschreibung
Sparta
Chantun
Contact
Kanton St. Gallen
Amt für Kultur
St. Leonard-Strasse 40
9001
St. Gallen