Festa da la vendemia a Vevey*

*Integrada en la glista represchentativa dal patrimoni cultural immaterial da l'UNESCO

Var 5 giadas mintga secul sa transfurmescha Vevey èn ina gigantica tribuna al liber per manifestar la passiun per las professiuns en connex cun la cultivaziun da las vignas. Quest ritem singular fa allusiun a la durada da la vita da las vits e da las generaziuns umaunas. Questa festa che surpassa tuttas dimensiuns vegn organisada da la mastergnanza dals viticulturs ch'exista dapi il temp medieval, cur ch'ils possessurs da las vignas èn s'unids per laschar controllar la buna lavur da lur culturas. A partir da l'onn 1772 decida la mastergnanza da premiar ils megliers viticulturs. L'emprima premiaziun publica ha gì lieu l'onn 1797, quai era il medem mument l'emprima festa da la vendemia en il vair senn dal pled. Sco reproducziun scenica da la tradiziun da la viticultura e da l'agricultura è la festa da la vendemia sa midada d'ina processiun religiusa ad in festa profana da la lavur umana e da la natira fritgaivla; ella vegn cumplettada d'allegorias pajaunas sco er da costums e da simbols giudaic-cristians: represchentadas vegnan las stagiuns (Bacchus sco represchentant da l'atun) e las professiuns agriculas, ultra da quai creaturas da tuttas sorts sco fauns, baccantas, autsacerdotas ed autsacerdots. Dapi il 19^avel tschientaner è la festa da la vendemia in spectacul enorm, al qual contribueschan poets, musicists e choreografs e che ha ina plazza tut speziala en ils cors dals Vadais. Durant 10 onns preparan els la festa, durant 10 onns vivan els en las regurdanzas. La festa da la vendemia l'onn 1999 èn sa participads var 5'000 acturs. La festa ha lieu dals 18 da fanadur als 11 d'avust 2019. 

Praticas socialas