Festas da giuventetgna da la champagna vadaisa

Maletg 1 /

‹ › ×

Las uniuns da giuventetgna da la champagna vadaisa han lur origin en il temp medieval. Da quel temp eran talas gruppaziuns en emprima lingia uniuns d'umens giuvens betg maridads da las regiuns champestras. Las uniuns da giuventetgna pussibilitavan da stabilir contacts tranter las persunas betg maridadas da tuttas duas schlattainas cun organisar festas legras, stgaffind uschia in cuntrapais a la predominanza da la populaziun pli veglia. Dapi l'onn 1919 è la giuventetgna champestra organisada en ina federaziun chantunala («Fédération vaudoise des jeunesses campagnardes FVJC») che duai franar en emprima lingia l'emigraziun da las regiuns champestras. La giuventetgna champestra organisescha occurrenzas en ils vitgs e gioga ina rolla impurtanta tar festas che caracteriseschan il decurs da l'onn champester (lotto, festas da tir, festas dal 1. d'avust, festas da Bumaun e.u.v.). Er tirs da premis, champs da skis, concurrenzas da teater u rallyes vegnan organisads da las uniuns da la giuventetgna champestra. Mintga onn han lieu quatter festas regiunalas, ils Girons, accumpagnads da concurrenzas da sport e da bavidas. Mintga 5 onns vegn festegiada empè d'in Giron ina Cantonale (festa chantunala), ina festa che dura 3 emnas e che ha dimensiuns impressiunantas. La Cantonale da Bavois da l'onn 2008 per exempel ha attratg passa 120'000 visitadras e visitaders. Las festas chantunalas èn in simbol per la solidaritad da la giuventetgna champestra. En il senn da l'anteriura devisa dal FVJC - «lavur, patria, amicizia, progress» - vegnan questas occurrenzas terminadas d'ina ceremonia uffiziala, accumpagnada da la surdada da la bandiera, dal imni vadais e dal imni da la giuventetgna champestra («Chanson fédérée»). Dals 3 als 21 fanadur 2019 celebrescha la FVJC ses 100^avel anniversari.