«Promotions» – la festa da promoziun

En Svizra franzosa vegn l'expressiun «Les Promotions» (la promoziun) duvrada per la fin da l'onn da scola e per la midada da las scolaras e dals scolars a la proxima classa. Questa tradiziun è vegnida introducida a Genevra da Calvin gia l'onn 1559. Da quel temp finiva l'onn da scola mintgamai il cumenzament da matg. La tradiziun ch'è sa mantegnida fin en il 19^avel tschientaner praticamain senza midadas aveva oriundamain in caracter fitg festiv cun ina ceremonia en la catedrala en preschientscha da las autoritads religiusas, politicas e giudizialas da la citad. Pli tard è ella vegnida cumplettada d'in past abundant ed ha survegnì tras quai in caracter anc pli festiv. Cun l’ir dal temp è questa tradiziun sa derasada en tut las vischnancas genevrinas ed è bainbaud vegnida introducida er en auters chantuns da la Svizra franzosa sco Vad, Neuchâtel e Friburg. A Losanna sco er en autras chapitalas istoricas dal Vad exista dapi il «Ancien Régime» ina festa cumparegliabla da las scolas che vegn organisada ozendi sco «Fête du Bois». Questa pratica è vegnida interrutta mo darar ed è sa sviluppada fermamain en il decurs dal temp. Da la festa oriunda è sa mantegnì per exempel a Genevra – sco «Fête des écoles» – mo il cortegi da las classas da scolina. Per la gronda superbia da lur geniturs sa travestgeschan ils uffants tenor tscherts temas e sa legran natiralmain da las differentas attracziuns ch’als spetgan suenter il cortegi (marenda, distribuziun da souvenirs, girs cun il carussel e.u.v.). Quellas dattan a questas festas in caracter patgific e ritual che vegn stimà tant da las scolaras e dals scolars sco er da tut las visitadras e visitaders creschids.