Fondue

Ins fa luentar vair chaschiel svizzer en in «caquelon», metta quel sin in «réchaud» amez la maisa, metta tocs paun u tocs tartuffel sin ina furtgetta, bogna quels en la massa da chaschiel – uschia giaudan ins ensemen cun amitgs u cun la famiglia il fondue da chaschiel renumà che vala en Svizra sco past naziunal. En sia varianta moderna, che vala nungiustifitgadamain sco invariabla, vegnan maschadads in cun l'auter trais products naziunals tipics, paun, vin e chaschiel. Quest past vala sco quintessenza da la simplicitad e da la cumpagnia ed unescha en sai schizunt tschertas valurs democraticas da la Svizra: l'egualitad, il partir solidaric e l'encreschadetgna da las muntognas.

Il fondue è documentà dapi l'onn 1699, ed a partir dal 18avel tschientaner sa chatta ses recept per il solit en ils cudeschs da cuschinar. Ils utensils da cuschinar adattads tutgan dentant pir en il decurs dal 20avel tschientaner tar l'equipament da standard da la gronda part da las chasadas. En il fratemp è il fondue daventà in simbol da la Svizra turistica ed ins scuntra el tant en il chantun Friburg sco er en autras regiuns en differentas variaziuns. Tar ils tips da fondue ils pli enconuschents tutga il «moitié-moitié», ina maschaida da chaschiel da Gruyère e da Vacherin friburgais, vin alv, vinars da tschareschas ed amet da tirc. In ulteriur classicher è il fondue cun Vacherin friburgais che vala sco bain digeribel, che consista mo d'ina spezia da chaschiel e che survegn ina consistenza cremusa grazia a l'agiunta d'in zic aua. Sch'ins ha ils utensils da cuschinar necessaris, èsi fitg simpel da far fondue – er sche restaurants spezialisads stattan fermamain attents da betg tradir lur recepts...


Sparta


Chantun


Descripziun detagliada

Publicaziuns

François de Capitani : Soupes et citrons. La cuisine vaudoise sous l’Ancien Régime. Lausanne, 2002

Musée gruérien (Ed.) : La Civilisation du Gruyère, Cahiers du Musée gruérien no. 2, Bulle, 1999

Isabelle Raboud-Schüle : Comment la fondue vint aux Suisses. In : Annales fribourgeoises no. 72, 2010, p. 101-112

Michel Schlup, Caroline Calame : Neuchâtelois à table (1750-1930). Fragments d'une mémoire culinaire et gastronomique oubliée. La Chaux-de-Fonds, 2011

Chavazzins

Atun

Enviern

https://www.lebendige-traditionen.ch/content/tradition/rm/home/tradiziuns/fondue.html