Ils schumbers da Basilea

Per bleras abitantas e per blers abitants da Basilea è il schumber in simbol d'identificaziun. En la populaziun datti passa milli tamburas e tamburs scolads. Per dumagnar ils elements da basa dal schumbrar èsi necessari d'exercitar plirs onns. Scolas che vegnan manadas oravant tut da cliccas da tschaiver da Basilea instrueschan la tecnica da frasament che n'è betg fixada en scrit e da la quala l'effect vegn savens cumpareglià cun il «sentiment da swing» dal jazz. Ils onns 1920 ha dr. Fritz Berger, enconuschent sco «docter dal schumber» («Drummel-Doggter»), sviluppà ina notaziun per il schumber ed ha procurà uschia ch'il schumbrar da Basilea ha chattà in'attenziun internaziunala. Il success dal schumbrar da Basilea ha sias ragischs en l'istorgia ed en la societad da la citad. Dapi il temp medieval n'è l'art da schumbrar mai stada unicamain en il servetsch da la schuldada, mabain ha pudì vegnir raffinada er per auters intents. Schumbrà vegni a Basilea er oz a chaschun da differentas occurrenzas: al tschaiver, al di dal «Vogel Gryff», a festivitads da la citad u ad occurrenzas privatas. La tradiziun da Basilea ha influenzà il schumbrar e la musica da tschivlots en tut la Svizra.