La bilinguitad a Bienna

Maletg 1 /

‹ › ×

Las quatter linguas naziunalas valan sco ina caracteristica da la Svizra. I sa tracta però per gronda part d'ina plurilinguitad territoriala. Mo en las regiuns als cunfins da las linguas sa maschaidan las linguas en la communicaziun quotidiana. La citad da Bienna è caracterisada d'ina «bilinguitad consensuala»: il franzos ed il tudestg han il medem status, nagina lingua na vegn preferida da princip e las duas gruppas linguisticas acceptan e respectan mintgamai la lingua da l'autra gruppa linguistica. In studi davart la bilinguitad a Bienna ed a Friburg ha punctuà che la coexistenza da las linguas vegn vivida a Bienna «en moda exemplarica». Bienna na saja betg mo ina «pitschna Svizra» en quai che reguarda la repartiziun da las quotas linguisticas tar la populaziun da la citad. Bienna possia er esser in exempel per la Svizra en relaziun cun la plurilinguitad. Tar discurs en il spazi public determinescha quella persuna la lingua, che cumenza la conversaziun. Franzos u tudestg n'importa betg - il visavi s'adatta, er sch'el na sa betg discurrer fitg bain la lingua da l'autra persuna. Dapi ils onns 1980 vegn quest cumportament numnà il «model da Bienna».