A partir dal temp medieval sa concentrescha la gronda part da l’economia alpestra da l’artg dal Giura e cunzunt da la chadaina dal Chasseral sin las «métairies» (bains purils da muntogna cun ustaria). Anc oz dattan quellas albiert a muaglia durant la stad e porschan ina cuschina locala.
La «métairie» è apparida il 13avel tschientaner sin il territori da la Svizra actuala ed è naschida dal «métayage» (fittanza agricula), ina furma da locaziun da funs, tar la quala il proprietari ed il gestiunari dal terren han partì en parts egualas las expensas e la racolta. Oz dumbran la chadaina dal Chasseral e las collinas dal chantun da Neuchâtel var 70 «métairies» ch’appartegnan principalmain a vischnancas e communitads burgaisas, ad agriculturas ed agriculturs sco er a sindicats da tratga. Quellas vegnan abitadas durant la stad u l’entir onn. Parallelamain a lur activitad agricula èn bleras da quellas er ustarias da muntogna per viandantas e viandants.
La furmaziun da «métairies» ha permess da valurisar las resursas natiralas da la muntogna e da contribuir en moda decisiva al svilup economic d’ina regiun pauc accessibla e situada en in clima difficil. Las «métairies» han furmà plaun a plaun la cuntrada caracteristica da las crestas giurassianas cun lur pastgiras cuvertas da guaud e lur mirs sitgs – ed ellas han plinavant er participà a l’intermediaziun da tradiziuns anc adina vivas.
