Patua dal Vallais francofon

Il patua dal Vallais francofon è ina varietad linguistica che vegn quasi mo discurrida. Ella tutga tar la gronda famiglia dal francoprovenzal. Questa gruppa dialectala cunfinescha al nord ed al vest cun la lingua d'oïl, al sid ed al sidvest cun ils dialects da las linguas d'oc, a l'ost cun la lingua tudestga ed al sid cun la lingua taliana. Per tradiziun è l'utilisaziun dal dialect limitada al sectur agricul e famigliar. Sias expressiuns èn per part uschè differentas, ch'ins ha mintgatant difficultads da sa chapir d'in lieu a l'auter! En consequenza da la modernisaziun datti er en il chantun Vallais adina damain persunas che san il dialect, dentant insaquants amaturs passiunads che s'engaschan nunstanclentaivlamain per mantegnair il patua en furma da vocabularis, da registraziuns linguisticas u da preschentaziuns da teater. Il patua dal Vallais francofon è sa conservà – sco il dialect dal chantun Friburg e sco ils auters dialects da la Svizra franzosa – en numerusas chanzuns ed en numerus raquints tradids. I dat er in grond dumber d'inscenaziuns da teater cun acturs laics che sa preschentan sin tribuna a chaschun da tschertas occurrenzas e che vegnan sustegnids da la «Fédération cantonale valaisanne des amis du patois.» Schizunt artists che na san betg directamain il patua al laschan reviver sin lur turneas e sin lur discs cumpacts. E finalmain èn las 1529 emissiuns en e davart il patua, ch'il radio da la Svizra franzosa ha realisà dals onns 1952 fin 1992, ussa puspè accessiblas en l'internet.

Arts figurativs
Praticas socialas