Teater laic en la Svizra centrala

Maletg 1 /

‹ › ×

Il teater giugà da laics è derasà en tut la Svizra centrala ed è francà fermamain en la societad. La mesadad dals chantuns ha dapli societads da teater che vischnancas (Sutsilvania, Sursilvania, Zug) ed er ils ulteriurs chantuns han quotas fitg autas. Ma la scena n'è betg mo caracterisada da quantitad, mabain er da qualitad. En blers vitgs ed en numerusas citadinas preschentan gruppaziuns excellentas producziuns che vegnan stimadas lunsch suror ils cunfins da l'atgna vischnanca. Per exercitar in toc, per crear las culissas u per organisar in program accumpagnant impundan ils participads bunamain tant temp sco quai ch'i vegn investì per inscenaziuns professiunalas. Cun l’ir dal temp èn singulas tribunas sa sviluppadas ad instituziuns da teater da renum surregiunal, uschia per exempel il «Japanesenspiel» a Sviz (dapi l'onn 1857), ils «Tell-Spiele» ad Altdorf (dapi l'onn 1899) u il «Einsiedler Welttheater» (dapi l'onn 1924). La tradiziun da teater da la Svizra centrala è caracterisada da la cultura catolica da l'inscenaziun. Gieus festivs religius vegnivan preschentads en moda pompusa gia durant il temp modern tempriv. A partir dal 19^avel tschientaner è il plaschair da giugar teater vegnì instituziunalisà en las societads da teater. En ina scena animada existan oz differentas spartas ina sper l'autra ed ina cun l'autra, sco la burlesca populara, il gieu sut tschiel avert, il teater da tschaiver, il teater d'operetta u il teater pretensius d'amaturs.