Revista genevrina (Revue genevoise)

La Revue è il num d’in spectacul umoristic e satiric annual che beffegia, en furma da chanzuns e scenettas, las flaivlezzas da la vita politica genevrina (però er naziunala ed internaziunala) e commentescha en moda sgiamanta las mancanzas umanas e da la societad en general. La Revue tematisescha las preoccupaziuns actualas da las Genevrinas e dals Genevrins en moda insolenta e divertenta. Ina gruppa da cumediantas e cumediants, da musicistas e musicists e da sautunzas e sautunzs la preparan mintg’onn sut l’egida d’in u da plirs reschissurs umoristics ch’èn en general auturs da texts. La Revue exista dapi l’onn 1892 ed attira mintg’atun millis d’aspectaturs ch’apprezieschan da pudair far beffas dals politichers locals, naziunals e schizunt internaziunals. La Revista genevrina vegn actualmain subvenziunada dal Departament da cultura e da sport da la citad da Genevra sco er da plirs partenaris privats. I existivan u vegnan creadas occasiunalmain anc autras «Revues» che sa basan sin il medem model sco per exempel la «Revue de l’Ordre des avocats» u la «Revue des députés».

Praticas socialas