Viadis da la Belle Epoque en la regiun dal Lai da Genevra

A la sava dal 19avel al 20avel tschientaner ha la Belle Epoque purtà il triumf da la moda da viver e da l'ideologia burgaisa, quai ch'è sa manifestà er en in entusiassem creschent per viadis da divertiment. La Svizra era gia dapi la fin dal 18avel tschientaner ina impurtanta destinaziun per viadis romantics ed ha stuì amplifitgar fermamain sia infrastructura turistica en il decurs dal 19avel tschientaner per respunder a questa dumonda. Las rivas dal Lai da Genevra tutgavan tar las destinaziuns da viadi preferidas, tant sco la citad da Genevra ch’era en il 19avel tschientaner la pli impurtanta colliaziun cun Chamonix. Destinaziuns fitg popularas eran er Ferney-Voltaire, il chastè Coppet, Signal de Bougy, Losanna e Clarens. Pli tard èn vegnids vitiers Montreux, Chillon e l’entira regiun dal Lai da Genevra. L’auta societad internaziunala amava da quel temp spezialmain ils Grands Hôtels en lieus sco Vevey, Montreux, Interlaken, Lucerna e San Murezzan. Curas d'aria frestga eran en moda ed han attratg viagiaturs en las autezzas da l'artg dal Giura, en ils Pays d’Enhaut ed en las Alps vadaisas. Per pudair satisfar a la dumonda creschenta duvravi dapli meds da transport. Las societads da bartgas a vapur sin il Lai da Genevra ha gì in temp da prosperitad a partir da l'onn 1823, pli tard lura er las viafiers e las telefericas. Fastizs da quest progress e la bellezza da las infrastructuras èn sa mantegnids fin oz ed èn restads in'attracziun turistica durant ils mais da stad.