L'Escalade

Maletg 1 /

‹ › ×

«Ed uschia vegnan mazzads ils inimis da la republica!» Sfratgond en tocs in avnaun da tschigulatta festiveschan las Genevrinas ed ils Genevrins mintg‘onn lur victoria nunspetgada sur il Duca da Savoia. Cun passa 2000 mercenaris ha quel attatgà la citad la notg dals 11 als 12 da december 1602. Ad ina truppa da bundant 200 umens èsi gartegià da raiver sin il mir da la citad. L'attatga ha pudì vegnir dustada grazia al curaschi da la populaziun – surtut da la Mamma Royaume che ha, tenor la ditga, svidà in avnaun cun schuppa buglienta sur ils mercenaris inimis. Questa attatga nocturna è sa fitgada per adina en la memoria da las Genevrinas e dals Genevrins. La tradiziun da sfratgar en tocs in avnaun è dentant documentada pir dapi l'onn 1881, ma festas commemorativas da questa victoria vegnan celebradas dapi l'onn 1603. Questa festa tant solenna e sfranada ha chaschunà durant in lung temp discordanzas tranter ils aderents d'ina reconstrucziun dals eveniments istorics e las Genevrinas ed ils Genevrins che preferivan ina mascarada e che han transfurmà la Fête de l'Escalade il 19avel tschientaner en ina spezia da pitschen tschaiver refurmà.

Sco vair simbol per il spiert revoluziunari ed independent da las Genevrinas e dals Genevrins dat la festa als pli pitschens la chaschun da batter porta tar ils vischins e da chantar per in zic munaida u per in pèr zutgerins «Ah la belle Escalade» u «C’é qu’è lainô». Questa chanzun è ina da las ultimas restanzas dal dialect savoiard. La fin d'emna il pli datiers da la data da l'attatga han lieu differentas festas da costums e cortegis cun pleds uffizials. En la catedrala Saint-Pierre vegn salvà in cult divin per la Fête de l'Escalade, al qual vegnan envidads aderentas ed aderents da differentas religiuns. Dapi l'onn 1978 vegn er organisada l'emprima fin d'emna da december cun la «Course de l’Escalade» ina cursa tras la citad ch'è daventada precis uschè legendara.