«Chlefelis» èn plattinas da lain dir tagliadas e muladas giu che han ina encrennada dad ina vart. Dus u trais «chlefelis» vegnan serrads tranter la detta dad in maun e laschads resunar tras moviments cun schlantsch. Cun muventar las plattinas endretg resunan ritmus da marsch e da saut sonors. Anc avant tschient onns para la pratica da quest simpel instrument da percussiun d’esser stada derasada pli u main fitg en tut las regiuns da la Svizra. En ils territoris catolics da la Svizra Centrala pratitgavan ils uffants ed ils giuvenils il «chlefele» oravant tut durant il temp da curaisma. Els preschentavan lur abilitads ritmicas sin via a scola ubain a chaschun da cortegis tras ils vitgs.
Durant ils onns suenter la guerra è l’usit svanì bunamain dapertut ed è vegnì pratitgà mo pli individualmain ubain en il rom da singulas occurrenzas folcloristicas – cun excepziun dal chantun Sviz. Qua ha il «chlefele» pudì sa mantegnair en vasts circuls da la populaziun, perquai ch’i èn vegnidas prendidas ils onns 1960 e 2000 mesiras efficazias per tgirar quest usit. Surtut grazia a l’introducziun dals «Priis-Chlefelen» a Sviz, en il Muotathal ed a Steinen è la tradiziun restada viva. A quests eveniments cumpetitivs, che han lieu mintgamai intgins dis avant venderdi sontg, prendan part mintga onn totalmain passa 400 uffants. Uschia disponan las scolaras ed ils scolars durant il temp da curaisma d’in repertori bain exercità che vegn alura er adina puspè sunà ad hoc sin las plazzas da scola ed en las streglias. Cun l’uniun «s’Chlefele läbt» exista ina purtadra activa da l’usit. Intginas gruppas da musica populara fan diever da «chlefelis» sco instruments d’accumpagnament, però senza avair ina impurtanza pli gronda en questa domena.
