Autonomia en il center autonom per giuvenils a Bienna

Dapi sia creaziun vers la fin dals onns 1960 mussa il center autonom per giuvenils (Autonomes Jugendzentrum AJZ) a Bienna exemplaricamain tge che muntan autonomia e cundecisiun libra. L’AJZ è ina rait da projects socioculturals e dapi l’onn 1978 giuridicamain in’uniun. L’organ suprem è la radunanza plenara che vegn convocada en moda regulara. L’assamblea da las utilisadras e dals utilisaders s’occupa mintg’emna da las dumondas da las singulas gruppas e dals projects dal AJZ. Las sedutas èn publicas, funcziunan normalmain en moda democratica da basa e tenor consens. Gruppas d’activitad (sco l’alloschi d’urgenza «Sleep-In» ubain la scola da circus «Zircologik») organiseschan lur projects independentamain e per part en atgnas localitads. Las gruppas da lavur exequeschan las lavurs necessarias per il manaschi, sco per exempel l’organisaziun d’occurrenzas en il «Gaskessel», l’edifizi principal dal AJZ.

Cun in dumber annual da 70 000 visitadras e visitaders che vegnan nà da l’entira Svizra è la «Coupole» respectivamain il «Chessu» daventà il center da cultura il pli impurtant da la regiun. L’AJZ a Bienna guarda – sco in dals paucs spazis libers socioculturals – enavos sin bunamain tschuncanta onns istorgia. Igl era ed è anc adina in lieu, nua ch’ins po decider sez e nua ch’ins po realisar ideas, senza restricziuns tras convenziuns e reglas socialas, schebain ch’igl existan cunfins fixads internamain. Il lieu è avert per tuts che vulan participar e cundecider: la cumposiziun dal collectiv sa mida trasor, las valurs e la savida da projects vegnan transmessas cuntinuadamain. Uschia ha l’AJZ caracterisà pliras generaziuns en la regiun da Bienna: sco lieu d’inscunter da las alternativas e dals alternativs ubain sco lieu, nua che artistas ed artists, nunconformistas e nunconformists e blers auters han chattà in spazi liber per la realisaziun da sasez. La tradiziun dal AJZ represchenta l’autonomia, la toleranza visavi subculturas e gruppas marginalas sco er l’avertadad per novas chaussas.


Sparta


Chantun


Descripziun detagliada


Documents da video

Publicaziuns

Renato Maurer, Damian Bugmann: Die Geschichte des AJZ Biel, Band 1: 1968-1981. Biel, 2008.

Renato Maurer: Die Geschichte des AJZ Biel, Band 2: 1981-1995 (im Druck)

Renato Maurer: 40 ans la Coupole - Autonomes Jugendzentrum Biel. Das älteste AJZ der Schweiz feiert 40 Jahre Betrieb und schon bald 50 Jahre Geschichte. In: Bieler Jahrbuch 2015. Biel, 2016. p. 173-177

Yves Niederhäuser: Beat-Soirées und Sit-ins: Popmusik und das AJZ im Biel der 1960er Jahre. In: Bernhard C. Schär et al. (Ed.): Bern 68. Lokalgeschichte eines globalen Aufbruchs - Ereignisse und Erinnerungen. Baden, 2008, p. 57-73

Chavazzins

Contact

BenutzerInnen-Kollektiv des AJZ
Gaswerkareal (Esplanade)
2503 Biel

Verein Autonomes Jugendzentrum (AJZ) Biel
Postfach 1305
2501 Biel
E-mail

Stampar il contact

https://www.lebendige-traditionen.ch/content/tradition/rm/home/tradiziuns/autonomia-en-il-center-autonom-per-giuvenils-a-bienna.html