Allevament da muvel e cumbats da vatgas

L’allevament tradiziunal da muvel vegn pratitgà ozendi en il Vallais per las suandantas razzas: vatga dal raz Eringer, arment dal raz Evolener, nursa cun nas nair, nursa alva alpina, nursa vallesana e chaura cun culiez nair. En quest connex ha la vatga dal raz Eringer ina posiziun speziala. Ultra da sia robustadad corporala sa profilescha quest animal tras sia cumbattivitad. A chaschun dals cumbats da vatgas sin las alps durant la stad determinescha la scossa sia vatga pugniera. Tar ils cumbats da vatgas en la planira dal Vallais, sco ch'els vegnan organisads dapi ils onns 1920, stattan en il center ils basegns da las generaziuns pli giuvnas: en quests cumbats da vatgas ha il Vallais chattà in simbol per la regurdanza al passà agrar che svanescha plaun a plaun. A la vatga dal raz Eringer è vegnì attribuì in chapital simbolic che ha laschà daventar ella la segunda mesadad dal 20^avel tschientaner l'animal da niz il pli impurtant dal Vallais. Las razzas da l'allevament tradiziunal da muvel han ozendi ina ferma preschientscha en la tradiziun da festa e d'usits dal chantun, valan sco bain cultural e sco segns caracteristics dal Vallais. En il cas da l'allevament tradiziunal da muvel sa tracti pia d'in fenomen che ha ina ferma relaziun cun il passà e ch'è – il medem mument – influenzà fermamain dal temp actual.

Praticas socialas