Societads da musica

Maletg 1 /

‹ › ×

En Svizra datti bunamain en mintga vischnanca ina societad da musica. Las societads da musica exerciteschan regularmain, dattan concerts e participeschan a differentas occurrenzas publicas. La giuventetgna ha bleras pussaivladads da s’engaschar en musicas giuvenilas. La cumposiziun da questas gruppas da musica e lur grondezza sco er l’instrumentaziun varieschan, damai che mintga commembra e commember po per regla tscherner sez ses instrument. Il pli savens chattan ins gruppas d’armonia che sa cumponan da sufladers d’instruments da lain, da sturs e da battaria. Er las bands da brass che s’orienteschan a l’exempel englais, èn fitg popularas. Las societads da musica pussibiliteschan ina interacziun tranter pliras generaziuns ed in hobi attractiv en la societad, che lascha nascher er lungas amicizias tranter las musicantas ed ils musicants. Il repertori da las societads da musica è multifar cun ovras or da la musica concertanta, tradiziunala e da trategniment. En ils ultims decennis è sa sviluppada ina vasta lavur cumpositorica che, cumpareglià cun pli baud, ha stgaffì adina dapli ina musica originala per las diversas furmas e per tut ils stils da la scena da las societads da musica. Ultra da quai dovran ils orchesters er adina puspè transcripziuns d’ovras impurtantas da tut ils geners dal far musica. Las societads da musica èn structuradas sco uniuns e lur dirigentas e dirigents survegnan savens ina indemnisaziun modesta. La gronda part da las societads èn commembers da l’Uniun svizra da musica (USM) ch’ha actualmain passa 50’000 commembers e stgars 2’000 uniuns affiliadas. La direcziun da las societads da musica surpiglian musicistas e musicists professiunals u amaturs bain scolads.