Tar il trair schibettas l'emprima dumengia da curaisma schlavazzan mats e giuvens da Vaz Sut rudellas da lain ardentas d'ina collina giu en la val. Sin il far notg sa rendan ils giuvenils sur il vitg a las differentas plazzas da trair schibettas. Els portan cun sai ina fuschella, ina lunga pertga da coller e rudellas da lain da fau ch'èn vegnidas fatgas suenter Bumaun, setgentadas e liadas vi d'ina corda. Arrivads sin las plazzas, mettan ils tiradurs ina rudella a la giada sin la pertga da coller, la tegnan en il fieu fin che la rudella arda e la schlavazzan lura cun schlantsch da la rampa da lain giu en la val.
Accumpagnada vegn mintga rudella d'in clom, ina dedicaziun ad ina matta u ad ina dunna nubila: «Höut un dära sei si, dia Schiiba, dia Schiiba ghört dr Anna». Sin la plazza communala suna la societad da musica per la vischnanca radunada che chanta la chanzun dal trair schibettas. Suenter che l'ultima rudella è vegnida schlavazzada giu en la val sa mettan ils giuvens cun lur fuschellas en maun en via vers chasa. En il vitg van els tar quella matta, a la quala las rudellas èn stadas deditgadas e survegnan là patlaunas da mangiar: «Au a Schiiba gschlaga, au a Chüechli». En ils vitgs da Danis-Tavanasa e Dardin (Breil) en Surselva vegn questa tradiziun celebrada mintgamai la sonda avant la dumengia da Curaisma.
