La regiun da Sargans è enconuschenta en il conturn sco center dal tschaiver. En la «tschintgavla stagiun» èn da vesair a chaschun da cortegis e d’autras manifestaziuns mascras da lain tradiziunalas. Entagliar e purtar mascras da lain durant il tschaiver è qua ina isanza populara che vegn tgirada gugent.
Entant ch’il tschaiver vegniva festivà antruras oravant tut sin via, en ustarias u en chasas, èn vegnids vitiers tar ils cortegis da tschaiver bals da mascras e concerts da «guggas» pli gronds. Ina part integrala impurtanta dal tschaiver en il passà era da beffegiar las autoritads e las persunalitads dal vitg. En furma da spectaculs vegniva commentà la vita en il vitg e vegnivan fatgas autras furbarias. Cun mascras da lain entagliadas vegnivan ils originals dal vitg caricaturads cun fisionomias marcantas u cun cumportaments che dattan en egl.
L’usit d’entagliar mascras è vegni en moda en la regiun da Sargans il cumenzament dal 19avel tschientaner. Lavurers migrants han purtà quest artisanadi en la regiun. Fin en ils onns 1930 eran las mascras da la regiun da Sargans per gronda part mascras da caracter. Pli tard èn plinavant vegnidas en moda mascras da sgarschur, da demunis e da diavels. Las mascras da strias ch’èn fitg derasadas oz sa basan sin las mascras pli veglias dals «Wiibli».
Suenter la Segunda Guerra mundiala hai dà in veritabel boom d’entagliar che dura fin oz. Ultra da l'imitaziun da mascras veglias èn naschidas novas ovras creativas. Flums è daventà in center da l'art d'entagliar mascras ed ha creà tips da mascras ch'èn enconuschents er lunsch ordaifer la regiun. Ina contribuziun impurtanta al mantegniment da la tradiziun d'entagliar en la regiun da Sargans prestan las uniuns d'entagliar nov fundadas. Quellas porschan curs d’entagliar populars e transmettan las tecnicas d’entagliar. Oz datti en la regiun da Sargans circa sessanta persunas ch'entaglian mascras durant lur temp liber.
