Viandar

Nuà ils chalzers, a dies il satgados, in ultim sguard sin il mussavia u sin la charta, e dai: Circa 60 % da la populaziun svizra enconuschan quest ritual e sa mettan pliras giadas per onn sin viadi en la cuntrada. Uschia è il viandar, che collia en moda recreativa in'activitad corporala moderada cun l'experientscha da la natira, l'activitad sportiva la pli populara da noss pajais. Cuntrari a l'alpinissem sa restrenscha il viandar per il solit sin sendas battidas, perquai n'èn betg necessaris meds da segirada ed abilitads da la tecnica d'alpinissem. Per pudair viandar stattan a disposiziun sendas da viandar marcadas e libramain transiblas da var 65 000 kilometers. Il mantegniment da questas sendas è francà dapi l'onn 1979 sco incumbensa dal stadi en la Constituziun federala e vegn ademplì d'organisaziuns chantunalas. La cultura da viandar cumpiglia il resguard vicendaivel ed in tractament cun respect da la fauna e da la flora. Guids da viandar, columnas davart il viandar en gasettas e revistas, chartas da geografia analogas u digitalas sco er plattafurmas online gidan a planisar e sustegnan a transmetter la pratica, per la quala èn tradiziunalmain responsablas la famiglia, la scola e las uniuns. Il viandar cun orientaziun turistica en il senn actual ha sias ragischs spiertalas en il temp da l'illuminissem en il 18avel tschientaner ed è collià cun nums sco Albrecht von Haller, Jean-Jacques Rousseau e Johann Gottfried Ebel che ha preschentà l'onn 1793 l'emprim guid da viandar cumplessiv da la Svizra.