Stgars la mesadad da tut las abitaziuns da societads cooperativas da la Svizra sa chatta en il chantun Turitg. Naschidas èn las societads cooperativas per la construcziun d'abitaziuns socialas ils onns 1920. Pervia da la mancanza acuta d'abitaziuns èn sa stentadas forzas politicas, persunalitads engaschadas, ma er burgaisas e burgais per la fundaziun da societads cooperativas per la construcziun d'abitaziuns e per lur activitad da construcziun.
Las societads cooperativas per la construcziun d'abitaziuns s'engaschan per abitaziuns favuraivlas, persistentas e cuminaivlas. Perquai ch'ellas n'han naginas finamiras da gudogn, èn ils tschains da locaziun da lur abitaziuns var 20% pli favuraivels che quels dal martgà d'abitaziuns privat.
Las societads cooperativas per la construcziun d'abitaziuns da la citad e dal chantun Turitg èn organisadas en la Federaziun dals purtaders da chasas d'abitar d'utilitad publica. La federaziun regiunala wohnbaugenossenschaften zürich represchenta passa 250 purtaders d'utilitad publica (principalmain societads cooperativas per la construcziun d'abitaziuns) cun var 60'000 abitaziuns en la citad ed en il chantun Turitg.
Ils ultims onns è la quota dal martgà da societads cooperativas per la construcziun d'abitaziuns sa reducida sin nivel svizzer a 5%. En la citad ed en il chantun Turitg procuran basas giuridicas e projects da construcziun innovativs per ina reanimaziun dal moviment da las societads cooperativas.
