Fiera da tschagulas (Zibelemärit)

Maletg 1 /

‹ › ×

La fiera da tschagulas («Zibelemärit») è ina festa populara tradiziunala che ha lieu mintga onn il quart glindesdi da november en la citad da Berna. Las puras ed ils purs portan var 50 tonnas tschagulas ed agl en la chapitala federala. Sin la Plazza federala ed en las giassas tranter la chasa municipala e la staziun stattan numerus stans da martgà decorads cun tarscholas da tschagulas tipicas, cun arranschaments e cun figuras da tschagulas. Sin auters stans vegnan er vendids legums d'enviern u paun da fiera («Magenbrot»), vin chaud e souvenirs. In pèr stans cun cheramistas regordan a la fiera da vaschella («Chachelimärit») da pli baud cun l‘enconuschenta cheramica rurala bernaisa. La fiera da tschagulas che deriva da la fiera da Son Martin dal temp medieval è sa sviluppada a l'occurrenza la pli visitada dal chalender da las isanzas chantunalas. Gia a partir da las 5.00 sa mova ina gronda fulla glieud tras las giassas. En las ustarias vegnan servidas la petta da tschagulas tradiziunala, la petta da chaschiel e la schuppa da tschagulas. La fiera da tschagulas è er enconuschenta per la battaglia da confettis e per la fiera sin la Schützenmatte. Ultra da la teoria da l'etnolog Rudolf J. Ramseyer che datescha l'origin da la fiera da tschagulas a la mesadad dal 19^avel tschientaner e che la declera sco restanza da la messa da Son Martin che durava da quel temp duas emnas, datti differentas legendas da l'origin da la fiera da tschagulas.