Istorgias da spierts en la Svizra centrala

Istorgias da spierts che fan barlot èn tradiziuns narrativas viventas en la Svizra centrala. Els cumparan mintgamai en in lieu ch'exista en realitad en ils conturns dal mintgadi. Las persunas ch'èn pertutgadas dal striegn existan u èn mortas (cuntrari a la gronda part da las ditgas e da las legendas, nua che las persunas n'existan betg en realitad). En il center da las istorgias stat la descripziun d'in fenomen che vegn interpretà sco surnatiral e che s'exprima en tuns, en moviments u en appariziuns visualas che na sa laschan betg declerar en moda raziunala. Quests fenomens vegnan attribuids ad olmas da persunas ch'èn mortas e che na pon savens betg vegnir identifitgadas pli detagliadamain. Discurrer en la publicitad davart appariziuns da spierts e da striegn è tabuisà. La tradiziun ha lieu cunzunt en il stretg ravugl da la famiglia u dals amis.