Far l'ortulan en la citad ha ina lunga tradiziun. Las citads da Winterthur e da Turitg èn caracterisadas fermamain da lur relasch cultural d'ierts. Il far l'ortulan en la citad è vegnì tgirà durant lungs temps en il rom d'ierts schrebertins e d'ierts da famiglia. Entant che l'autoprovediment steva al cumenzament en il center, èn ils ierts daventads pli e pli fitg lieus da recreaziun e da temp liber. La noziun «urban gardening» signifitga ina reanimaziun per ils ierts en la citad. In punct central dal «urban gardening» è il fatg ch'ils products agriculs vegnan cultivads cun schanegiar l'ambient e consumads conscientamain.
Ultra da quai ha l'iert ina gronda funcziun sociala ed integrativa: sco lieu per inscunters tranter ils differents milieus socials, per la furmaziun da la cuminanza e per la lavur da quartier.
A Turitg ed a Winterthur vegnan promovids activamain ils ierts en la citad. Per l'ina vegnan dadas a fittanza surfatschas sco ierts pitschens. Per l'autra mettan las citads a disposiziun surfatschas nuncultivadas per utilisaziuns intermediaras. Cun il sustegn da la citad vegnan stgaffids qua ierts creativs, che vegnan utilisads e cultivads cuminaivlamain da las abitantas e dals abitants.
