Urbarisaziun turistica da la cuntrada en la Svizra centrala

Maletg 1 /

‹ › ×

En l'Europa è sa furmada a la fin dal 18^avel tschientaner ina relaziun specifica envers la natira ch'è daventada essenziala per la vita moderna: l'urbarisaziun da la cuntrada a favur dal turissem, da l’alpinissem e dal passatemp. La regiun dal Lai dals Quatter Chantuns è stada confruntada da prim ennà cun quest svilup, e quai en in senn dubel: Per l'ina han ils emprims turists visità – ultra da la regiun dal Lai da Genevra e da la Surselva bernaisa – cunzunt er Lucerna, la Rigi ed il pass dal Gottard; per l'autra han questas activitads gì per consequenza ina urbarisaziun incumparabla e minuziusa da la cuntrada. Per il temp tranter 1870 e 1950 è documentada ina seria da projects da piunier che han pussibilità las purschidas turisticas fundamentalas ed elementaras, sco l'excursiun, la vista, il panorama u la variaziun da scenarias en la cuntrada. Parallelamain a l'avertura dal traffic èn vegnidas construidas infrastructuras d'hotellaria, da sport e da divertiment. Dapi la segunda mesadad dal 20^avel tschientaner na vai betg pli per la realisaziun d'ovras da piunier, mabain per il perfecziunament e per la concentraziun da las purschidas. L'appropriaziun da la cuntrada e da la natira per il turissem è ina pratica culturala immateriala ch'è francada dapi passa duatschient onns en la regiun da la Svizra centrala e che caracterisescha l'economia, il mintgadi e la mentalitad dals umans.