Schaffusa

Schaffhausen

Il chantun Schaffusa ha circa 80'000 abitantas ed abitants e sa chatta sco unic chantun da la Svizra al nord dal Rain. Il territori chantunal è dividì en trais parts: en la part meridiunala, en la part principala cun la chapitala Schaffusa ed en la part orientala. Schaffusa è in tipic chantun da cunfin cun var 152 km cunfin cuminaivel cun la Germania e cun var 34 km cunfin cuminaivel cun ils chantuns vischins Turitg e Turgovia.

Il patrimoni cultural immaterial dal chantun Schaffusa

Il chantun Schaffusa è vegnì industrialisà fermamain en la segunda mesadad dal 19avel tschientaner, oravant tut en il center enturn la citad da Schaffusa. La mecanisaziun da l'agricultura en il 20avel tschientaner e la mobilitad creschenta da la populaziun han chaschunà ultra da quai grondas midadas da las structuras socialas oriundas (cun caracter da vitg). Il resultat da quests svilups è stà che bleras furmas tradiziunalas dal patrimoni cultural immaterial ch'èn sa mantegnidas per exempel en las regiuns prealpinas da la Svizra n'èn betg pli vegnidas tgiradas ed èn uschia idas a perder.

La finamira da las lavurs per eruir il patrimoni cultural immaterial dal chantun Schaffusa che vegn tgirà anc oz è stada quella d'identifitgar tals exempels che pon avair ina relevanza istorica cumbinada cun purschidas da vendita exclusiva ed in aut grad da reconuschientscha per la populaziun en il chantun Schaffusa. Uschia èsi gartegià da registrar en la glista dal patrimoni cultural immaterial tradiziuns che n'avessan probablamain betg pudì vegnir resguardadas en auters chantuns, ma che han in grond potenzial d'identificaziun per il chantun Schaffusa.

Las tradiziuns vivas dal chantun Schaffusa ch'èn vegnidas resguardadas en la glista èn «la viticultura schaffusiana», «il navigar cun bartgas da pestga e la construcziun da bartgas da pestga», «l'illuminaziun da la cascada dal Rain cun fieus artifizials», «ils usits enturn il Munot», «ils ierts purils ad Osterfingen», «il gieu liber No e Wili» ed il mastergn d'urer (sco part da la tradiziun en tut la Svizra). Ulteriuras tradiziuns vivas che n'èn betg vegnidas resguardadas en la glista da las tradiziuns vivas en Svizra èn il cortegi da tschaiver da Schaffusa, la producziun da cliniez d'argient ed ils usits da las societads e da las mastergnanzas.

La tgira e la promoziun da la cultura

La basa per promover la cultura è la Lescha da cultura dals 9 da schaner 2006 (SHR 441.100). L'art. 5 al. 2 definescha la dimensiun da la promoziun da la cultura e dat al chantun l'incumbensa da s'engaschar per la promoziun e per l'intermediaziun da la cultura contemporana e per il mantegniment, per la tgira, per la perscrutaziun tant sco per l'intermediaziun dals bains culturals tradiziunals. Cun quai è menziunà explicitamain il sectur dal patrimoni cultural immaterial. La pratica da promoziun tegna perquai er quint da questa incumbensa legala.

Instituziuns statalas sco archivs, museums e bibliotecas en il chantun Schaffusa s'occupan er cun aspects dal mantegniment dal patrimoni cultural immaterial. Ultra da quai s'engaschan purtaders privats, sco per exempel l'Uniun dal Munot, per il mantegniment da patrimoni cultural immaterial en il chantun Schaffusa.

Contact

Kanton Schaffhausen, Fachstelle für Kulturfragen
E-mail

Stampar il contact

https://www.lebendige-traditionen.ch/content/tradition/rm/home/kantone/schaffhausen.html